Vertragingstaktieke weer geïmplementeer in saak teen EFF-leier
Die leier van die EFF, Julius Malema, se regspan het vandag weer op vertragingstaktieke staatgemaak in ’n poging om geregtigheid te vertraag. Malema en sy lyfwag Adriaan Snyman staan tans in die Oos-Londense streekhof tereg na ’n klag wat deur AfriForum aanhangig gemaak is. Hierdie klagte is gelê nadat ’n video verskyn het waar dit voorkom dat die politikus ’n vuurwapen in die openbaar afvuur – die vuurwapen is deur Snyman aan Malema oorhandig.
Die Nasionale Vervolgingsgesag (NVG) vervolg Malema vir die afvuur van ’n vuurwapen in ’n beboude of openbare gebied sonder goeie rede om dit te doen, asook die besit van ’n vuurwapen en ammunisie sonder die nodige lisensie en magtiging.
Malema se regspan het vandag aangedui dat hulle ’n aansoek sal indien om landdros T. Olivier van die saak te laat onttrek. Dit het gevolg op ’n uitbarsting deur Malema vanuit die beskuldigdebank, wat beweer het dat landdros Olivier hom en Snyman vervolg, nadat sy vir een van die staatsgetuies vrae gevra het om sy getuienis duideliker te stel.
Gister, in nog ’n poging om die verhoor te vertraag, het Malema se regspan ’n “verhoor binne ’n verhoor” versoek om te bepaal of die videobewyse – wat na bewering wys dat Malema die wapen afvuur – toegelaat moet word. Landdros Olivier het beslis dat die videobewyse toegelaat kan word.
“Dit is niks meer as ’n doelbewuste misbruik van die regstelsel om die verrigtinge onnodig te vertraag nie. As Malema onskuldig was, sou sy regspan sekerlik die geleentheid aangegryp het om dit te bewys. Die videobewyse is egter baie duidelik,” sê Jacques Broodryk, AfriForum se woordvoerder vir Gemeenskapsveiligheid.
“Ons sal voortgaan om hierdie saak noukeurig te monitor, ongeag hoeveel keer dit uitgestel of vertraag word om te verseker dat Malema tot verantwoording geroep word. Politici moet daaraan herinner word dat hulle nie bo die wet verhewe is nie,” sluit Broodryk af.
