Valke het tot einde Mei om te reageer op Mbalula-aangeleentheid – of hof word genader
AfriForum se privaatvervolgingseenheid het luitenant-generaal Godfrey Lebeya, hoof van die Valke, tot 30 Mei gegee om sinvolle terugvoer te gee oor die stand van die korrupsie-ondersoek na Fikile Mbalula, die ANC-sekretaris-generaal. Die eenheid probeer sedert 2019, toe die saak deur Monique Taute, Hoof van veldtogte by AfriForum, geopen is, om antwoorde van die polisie en die Nasionale Vervolgingsgesag (NVG) te kry. In plaas daarvan word die saak heen en weer tussen die polisie en die NVG gegooi.
Die strafregtelike klag teen Mbalula spruit uit ’n 2018 Openbare Beskermer-verslag oor die destydse minister van Sport se gesinsvakansie na Dubai, wat die saak na die NVG verwys het “om te ondersoek of die fondse wat gebruik is om vir die reis te betaal nie die opbrengs van geldwassery was nie”. Alles dui daarop dat die NVG hierdie opdrag eenvoudig geïgnoreer het.
Die bewerings teen Mbalula is eenvoudig en ongekompliseerd. Dit behels dat die Dockrat-familie, deur middel van gekoppelde maatskappye, na bewering vir die politikus se vakansie betaal het – in ’n enkele transaksie met ’n reisagent sonder enige ingewikkelde forensiese ontleding van finansiële rekords en bankstate wat vereis word.
In ’n brief aan Lebeya gedateer 4 Mei het adv. Gerrie Nel, hoof van die eenheid, die rede tot kommer oor hoe die saak hanteer word herhaal. “Op grond van ons ervaring in hierdie en ander sake voer ons met respek aan dat die land se ellende met die bekamping van korrupsie ’n droom vir die Valke sal bly. Die rampspoedige ondersoek en vervolging van die Nulane Investment-aangeleentheid is ’n treffende voorbeeld van die voortgesette onbekwaamheid van die Valke.”
“Of die onbekwaamheid of politieke beskutting van sekere individue blyk voort te duur en is tekenend van die beroemde aanhaling uit George Orwell se Animal Farm: ‘All animals are equal, but some animals are more equal than others.’
“U word versoek om te reageer op ons vorige versoeke. Namens die klaer herhaal ons ons ontevredenheid met die gebrek aan vordering en versuim om betekenisvolle terugvoer te verskaf. Nog belangriker, ons voer aan dat u versuim om ’n voltooide saakdossier aan die Nasionale Vervolgingsgesag voor te lê sodat hulle oor ’n vervolging kan besluit, geloofwaardigheid verleen aan ons kliënt se bekommernisse oor vooroordeel,” het Nel in die brief gesê.
As Lebeya nie teen 30 Mei reageer nie, sal die privaatvervolgingseenheid geen ander keuse hê as om die Hooggeregshof in Pretoria te nader en regstelling te soek nie. Die onlangse brief en vorige korrespondensie kan die basis van die aansoek vorm.
