Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Mediaverklarings | Privaatvervolging Mediaverklarings

Sukses: Polisie arresteer verdagte in aanrandingsaak nadat privaatvervolgingseenheid ingryp

DeurAfriForum 14/08/202002/11/2020

Die beskuldigde wat verdink word van die aanranding met die opset om ernstig te beseer, menseroof, opsetlike saakbeskadiging en afpersing van Leonie Kambouris, is op 13 Augustus in Benoni gearresteer.

Dít volg nadat AfriForum se privaatvervolgingseenheid Kambouris op 5 Augustus bygestaan het om strafregtelike klagtes teen die beskuldigde by die Benoni-polisiestasie in te dien. Kambouris het reeds in Junie 2020 ’n beskermingsbevel teen haar man gekry, maar die polisie het geweier om haar te help toe sy in Julie vanjaar ’n klag wou lê.

Adv. Phyllis Vorster, aanklaer by AfriForum se privaatvervolgingseenheid, het namens die klaagster in die borgaansoek van die beskuldigde opgetree. Hoewel die beskuldigde op borgtog vrygelaat is, het die hof streng borgvoorwaardes gestel, onder meer dat hy nie die perseel van die gemeenskaplike woning mag betree, sy vuurwapens in besit mag hê of enige direkte of indirekte kontak met die klaagster mag hê nie.

“Ons verwelkom die feit dat die beskuldigde uiteindelik gearresteer is. Dit bly egter kommerwekkend dat AfriForum eers moes ingryp om die polisie te dwing om hulle werk te doen ten einde die slagoffer teen geslagsgeweld te beskerm. Ons moes selfs ’n klagte vir swak dienslewering registreer aangesien die polisie baie teësinnig was om ons te help met die lê van die klagtes. Die privaatvervolgingseenheid sal die saak deurlopend moniteer om te verseker dat geregtigheid geskied,” sê Andrew Leask, hoofondersoeker by AfriForum se privaatvervolgingseenheid.

Sien skakel na vorige verklaring: http://artikels.afriforum.co.za/privaatvervolgingseenheid-ondersteun-mishandelde-vrou-met-indien-van-klag-na-regstelsel-haar-versaak/.