Grondbesettingsaak: Desperate EFF se aansoek om verlof tot appèl deur derde en laaste hof met koste van die hand gewys
Die Hoogste Hof van Appèl het vandag ’n derde aansoek om verlof tot appèl deur Julius Malema en die EFF, teen ’n interdik wat AfriForum in 2017 verkry het, van die hand gewys. Dié interdik het Malema en die EFF verbied om mense aan te hits om privaat eiendom te betree en dit onwettig te okkupeer.
In Januarie 2023 het Malema en die EFF ’n aansoek om verlof tot appèl in hierdie saak by die Hooggeregshof in Pretoria ingedien – die aansoek is van die hand gewys. Hulle het die saak toe na die Konstitusionele Hof geneem, wat hul aansoek in Maart 2023 van die hand gewys het. Selfs nadat die hoogste hof in Suid-Afrika – die Konstitusionele Hof – hul aansoek om verlof tot appèl van die hand gewys het, het hulle besluit om die Hoogste Hof van Appèl te nader. Vandag se definitiewe uitspraak deur die Hoogste Hof van Appèl laat Malema en die EFF met geen verdere opsies vir appèl nie.
Dit is die vyfde terugslag vir Malema en die EFF in dieselfde saak. Eers is die interdik by verstek toegestaan omdat Malema se prokureurs nie in 2017 by die hof opgedaag het nie. Toe is Malema se herroeping-aansoek met koste van die hand gewys. Daarna het Regter Mabusa in die Hooggeregshof in Pretoria Malema se aansoek om verlof tot appèl van die hand gewys. Die Konstitusionele Hof het toe sy aansoek om direkte toegang en appèl van die hand gewys en nou het die Hoogste Hof van Appèl ook dieselfde appèlaansoek van die hand gewys omdat daar geen vooruitsigte op sukses is nie. Dit is nou vasgestelde wet dat aanhitsing om grond te betree en grond binne te val ’n ernstige misdaad is.
“Al is hierdie stryd teen die aanhitsing van misdadigheid deur boewe nou definitief verby, moet die vraag steeds gevra word: Waarom was Malema en die EFF so desperaat om toegelaat te word om grondbesetting aan te hits?” sê Ernst van Zyl, veldtogbeampte vir strategie en inhoud by AfriForum.
“Hierdie derde en laaste nederlaag vir Malema en die EFF in hierdie belangrike stryd is ’n groot oorwinning vir die reg op private eiendom en ’n verwoestende verlies vir diegene wat misdadigheid en wetteloosheid wil aanhits,” sluit Van Zyl af.
