Porojeke e e kopanetsweng ya tlhabololo ya temothuo e tlhagisa thobo e ntsi le go solegela baagi molemo

Porojeke e e kopanetsweng ya tlhabololo ya temothuo e e simolotsweng ke AfriForum le ba ba amegang mo go yone mo tlhagiso-dikumong ya temothuo ka 2022 ka tirisanommogo le Setlamo sa Kgwebo sa Thabake kwa Bokone Bophirima e tla simolola go bona thobo ya yone e ntsi gompieno. Gompieno ke tshimologo ya thobo ya jalo ya boraro ya diphotsa, mme go lebeletswe gore thobo eno e tla tswelela pele mo dikgweding di le tharo tse di latelang. Thobo eno le tse dingwe tse di fetileng, di tlhomolola go atlega ga porojeke eno, e gape e sologelang baagi ba lefelo leno molemo.

Lebo Mosime, Modulasetulo-Mogolo wa Setlamo sa Kgwebo ya Thabake, le setlhopha sa gagwe, ba tsamaisa porojeke eno mo karolong ya polase ya Boekenhoutfontein gaufi le Phokeng kwa Bokone Bophirima. Thobo e e fetileng ya dikhebitšhe tse di khibidu tsa boima jo bo fetang 400 kg e ne ya romelwa kwa NutriPick, e e eteletseng pele tiro ya go tlhotlha merogo le maungo le go tlamela dikgwebo-kgolo ka tsone. Go ne ga tlhagisiwa le dierekisi tsa boima jo bo fetang 800 kg. Mo e ka nnang  500 kg ya tsone e ne ya romelwa kwa NutriPick le kwa Spar Kroondal, mme 300 kg e e setseng ya tsone e ne ya abelwa Tshimologo Hospice le Sekolo sa Poraemari sa Phokeng. Gape Mosime o ne a abela sekolo seno sa poraemari peo ya dierekisi, e e setseng e jetswe mme gone jaanong e rojwa ke sekolo.

“Ke ikaeletse go tlogelela bana ba me boswa,” Mosime o ne a tlhalosa jalo. “Ga se tiro e e motlhofo, mme ke sa ntse ke ikemiseditse go dira ka natla go fitlhelela toro ya me. Motho o kopana le dikgwetlho di le dintsi mo tirong eno tse a tshwanelwang ke go di fenya ka boitshoko, mme diphenyo tse dinnye le toro ya go direla bana ba me dilo ttseno di dira gore ke tswelele pele ke sa kgaotse. Ke kgaratlhela go dira ka natla letsatsi le letsatsi gore ke diragatse toro eno. Go kgotsofatsa tota go fitlhelela ditlhoko tsa motlamela ka dikumo le go gorosa dikumo tsa boleng jo bo kwa godimo. Gape ke dirile tshwetso ya gore e se ka ya nna nna fela yo o solegelwang molemo ke kgwebisano eno, ka jalo ke tshiamelo e kgolo mo go nna gore ke solegele baagi molemo.”

Re motlotlo ka diphitlhelelo tse di fitlheletsweng fa e sale ka tshimologo ya kgwebisano eno, e e supang kgolo e e tswelelang pele ka ntlha ya go dira ka natla le ka boineelo. Ke tshiamelo mo go AfriForum go tshegetsa Lebo mo go diragatseng mokgele le toro ya gagwe,” ga rialo Nantes Kelder, e leng Mookamedi wa Bosetšhaba wa Porojeke: wa Dikamano le Tirisanommogo fa Gare ga Ditso Tse di Farologaneng.

“Re thusa Lebo go atolosa botsamaisi jwa gagwe le dikgono tsa gagwe tsa go rulaganya. Bana-le-seabe ba ba nang le dikgono tse di tlhokegang tsa mefuta e e farologaneng ya dijalo, menontsha, go laola diji le mefero le bone ba tsaya karolo, gape maano a tlhabololo ya temothuo a tsenngwa tirisong fa nako e ntse e tsamaya, go dira gore kgwebo eno e nne kgwebo ya temothuo e e kgonang go itsetsepela, le e e nang le maungo,” go bolela jalo Leon Lourens, Mookamedi wa Tlhabololo kwa Saai, mongwe wa batsayakarolo mo porojekeng.

“AfriForum e bopa marangrang a ditlhopha tsa batho ba setso ba ba ka kgonang go tshegetsana go dira gore bana botlhe ba baagi ba setso ba nne le bokamoso jo bo itumedisang mono mo Aforika Borwa. Go nna le seabe ga rona mo diporojekeng tse di tshwanang le eno ga go tokafatse tshireletsego ya dijo fela, go kgona go itlamela ga baagi, le go dira gore baagi ba maemo a a kwa tlase ba tshele botshelo mo bo ritibetseng; mme go nna le seabe se se botlhokwa sa go tlhomamisa gore go nna le tirisanommogo le dikamano tse di siameng fa gare ga baagi ba setso le go tshedisana ga bone ka kagiso lobaka lo lo leele,” go bolela jalo Barend Uys, Tlhogo ya Dikamano Tsa Ditso Tse di Farologaneng le Tirisanommogo kwa AfriForum.