Egpaar tot 14 jaar gevonnis vir mishandeling wat ses maande oue baba met beenbreuke gelaat het
’n Egpaar van Pretoria is effektief 14 jaar tronkstraf opgelê omdat hulle hul ses maande oue dogtertjie geslaan het en die baba met gebreekte ribbes, sleutelbene en bene gelaat het. Hul skuldigbevinding en swaar vonnis sou nie moontlik gewees het sonder die ingryping van AfriForum se privaatvervolgingseenheid, wat dokters bygestaan het om ’n strafsaak te open nie – nadat die eerste saak wat hulle aangemeld het, onverklaarbaar toegemaak is.
Die ma en pa het die bewerings ontken, maar is skuldig bevind aan aanranding met die doel om ernstig te beseer, en kinderverwaarlosing. Die strafregtelike klag is op 24 Julie 2020 ingedien. Die vonnis is op 20 Februarie 2023 in die Hooggeregshof in Pretoria opgelê.
Die babadogtertjie, wat na verwys word as Baba N, is vir die eerste keer in April 2020 in ’n hospitaal in Pretoria opgeneem met beserings wat met kindermishandeling ooreenstem – sy was vyf weke oud. Haar dokters en ’n private maatskaplike werker het toe ’n klag by die polisie en die Departement van Maatskaplike Ontwikkeling ingedien. Die bewerings het ingesluit dat die baba se ribbes op 15 plekke gebreek is. Terwyl dit aanvanklik ondersoek is en die kind in sorg geplaas is, het die polisie die dokters ingelig dat die saak toegemaak is weens ’n gebrek aan bewyse. Baba N is daarna weer in haar ouers se sorg geplaas.
Dit was toe dat die dokters die privaatvervolgingseenheid genader het. Die eenheid se ondersoekers het omvattende verklarings van al die betrokke partye geneem en die dossier saamgestel wat aan die polisie voorgelê is toe die tweede saak teen die ouers geopen is. Ná verdere druk van die eenheid het die polisie die egpaar in hegtenis geneem, en die vervolging kon begin.
Die getuienis wat die privaatvervolgingseenheid ingesamel het, is in die hofsaak gebruik. Dit het aan die lig gekom dat Baba N tussen Maart 2020 en Julie 2020 altesaam 31 beenbreuke opgedoen het.
Regter Hennie de Vos het in sy uitspraak besin oor die beserings wat die baba opgedoen het. “Die misdrywe wat gepleeg is, is so ernstig dat ’n swaar vonnis opgelê moet word. Na my mening is direkte gevangenisstraf onvermydelik. Baba N was weerloos en nie in staat om haarself te beskerm nie. Sy was afhanklik van die liefde, toegeneentheid en beskerming van haar ouers. In plaas daarvan is haar ribbes gebreek, haar femur is gebreek, en sy het ’n kneusplek op haar ken en swelling van die prevertebrale sagte weefsel in haar nek opgedoen. Sy was erg ondervoed,” het hy gesê.
Barry Bateman, woordvoerder van die privaatvervolgingseenheid, het die dokters en maatskaplike werkers geloof wat geweier het dat die kind aanhou mishandel word deur haar ouers. “Sonder die ingryping van die dokters en ander professionele persone sou hierdie baba moontlik aan die hand van haar ouers gesterf het. Kindermishandeling en verwaarlosing is van die vele gevare wat die kwesbaarstes in die samelewing in die gesig staar. Ons het nodig dat mediese beroepslui en versorgers wat sulke gevalle teëkom standpunt in neem, soos daar van hulle vereis word.
“Ons komplimenteer die aanklaer vir haar professionele en bekwame vervolging. Dieselfde kan egter nie van die SAPD gesê word nie. Sonder die ingryping en druk van die privaatvervolgingseenheid sou die saak waarskynlik weer net toegemaak geword het soos die vorige keer. Die publiek word voortdurend vertel hoe die regering geweld teen vroue en kinders ernstig opneem, maar ons sien nie dat dit deursyfer na die polisie op grondvlak nie,” het Bateman gesê.
