Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Buurtwag Mediaverklarings | Mediaverklarings

Buurtwagte ontvang kritieke opleiding in hantering van misdaadtonele

DeurAfriForum 23/11/202323/11/2023

Twee gesoute lede van die Suid-Afrikaanse Polisiediens (SAPD) – lt.kol. Albert Joubert en kol. Anton Oosthuizen – het vroeër vandeesmaand hul waardevolle kennis en ervaring rakende die korrekte hantering van misdaadtonele met buurtwaglede en sekuriteitspersoneel van George gedeel. Dié opleiding het kursusgangers met noodsaaklike basiese vaardighede en praktiese kennis oor dié kwessie toegerus. Buurtwaglede van AfriForum se George-tak, lede van die plaaslike Gemeenskapspolisiëringsforum (GPF) en ander veiligheidsorganisasies het die opleiding ondergaan en kan nou die steun wat hulle aan die George-gemeenskap bied, selfs meer doeltreffend aanpak.

Die kursus het buurtwag-, GPF- en sekuriteitslede toegerus met kennis oor die korrekte prosedure wat op enige geweldsmisdaad- of ongelukstoneel gevolg moet word. Die opleiding het onder meer gewys op toneelafsperring en die korrekte insameling- en bewaringsproses van bewysstukke.

Volgens Marthinus Erasmus, AfriForum se distrikskoördineerder vir die Suid-Kaap, is opleiding van dié aard onontbeerlik vir buurtwaglede. “Vanweë buurtwagte se uitgebreide vermoë en vinnige reaksietyd, is hulle dikwels eerste op ’n misdaadtoneel. Dit is juis daarom noodsaaklik dat hulle, totdat die SAPD of dergelike verantwoordelike wetstoepasser beheer van die misdaadtoneel kan oorneem, die regte prosedures volg ten opsigte van die beheer en bewaring daarvan,” verduidelik Erasmus.

“Ons is vasbeslote om George te beveilig en ons sal voortgaan om met die SAPD, GPF en ander rolspelers saam te werk om hierdie doelwit te bereik. Saam is ons sterker,” sê Èduan Naudé, voorsitter van AfriForum se George-tak.

“Dit is bemoedigend om te sien hoeveel ons kan bereik as ons saamwerk. AfriForum handhaaf ’n kultuur van samewerking en ons sal voortgaan om ’n betroubare vennoot vir die gemeenskap te wees,” sluit Erasmus af.

Om aan te sluit by AfriForum se George-tak of vir meer inligting, stuur ’n e-pos na voorsitter.george@afriforumtak.co.za of skakel ÈduanNaudé by 082 563 1439.