Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum Wêreldwyd bied kuieroggend aan vir mense met kinders of kleinkinders in die buiteland

AfriForum Wêreldwyd bied op 4 Desember ’n kuieroggend in Durbanville, Kaapstad, aan vir ouers en grootouers met kinders of kleinkinders wat in die buiteland woon.

Emigrasie het die afgelope jare toegeneem en baie ouers en grootouers het in die land agtergebly toe hul kinders en kleinkinders geëmigreer het. Daarom word hierdie kuiergeleentheid gehou en mense wie se kinders reeds geëmigreer het of wat beplan om te emigreer, word uitgenooi om die oggend by te woon.

Volgens Sue-Ann de Wet, hoof van Diaspora by AfriForum, het AfriForum Wêreldwyd besef wanneer mense se geliefdes besluit om die land permanent te verlaat, word heelwat uitdagings getrotseer. Hierdie is daarom die ideale geleentheid om ’n waardevolle ondersteuningsbasis op te bou vir daardie dae wat die verlange te veel raak. ’n Ondersteuningsbasis is ook belangrik om te help met die groot aanpassing én die emosionele wipwa.

“Wanneer jy die woord ‘emigrasie’ hoor, dink ’n mens eerste aan iemand wat die land verlaat en selde aan die geliefdes wat agterbly. Emigrasie is nie net ’n lewensveranderende werklikheid vir die kind wat emigreer nie, maar ook vir die mense wat agterbly,” sê De Wet.

Dr. Sulette Ferreira, ’n sosiaal wetenskaplike navorser en familieberadingsterapeut wat spesialiseer in die emosionele uitwerking van emigrasie, is die spreker vir die oggend. Sy is ’n emigrasiekonsultant wat berading aan families verskaf om hulle voor te berei op emigrasie om die meervlakkige verlies te verwerk.

Gaste by verleder jaar se kuiergeleentheid in Pretoria.

Kundiges gaan onder meer vrae help beantwoord soos hoe emigrasie benader moet word, hoe om verlange te hanteer, hoe om vertroud te raak met die emigrante se nuwe werklikheid en of jy moet oorweeg om alles prys te gee om by hulle te gaan woon.

Gaste gaan ook wenke kan deel wat hulle gehelp het of vrae vra wat sal help om die werklikheid van emigrasie te verstaan

Die kuieroggend vind 4 Desember om 08:30 vir 09:00 by Durbanville Hills Winery plaas. Beperkte plek is beskikbaar en dit is noodsaaklik om te RSVP. Registreer hier vir die kuiergeleentheid. Enige vrae kan gerig word aan Sue-Ann de Wet by wereldwyd@afriforum.co.za.