Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Argiewe

AfriForum-teenboelieveldtog besoek Laerskool Kenmare

Deurafriforum 03/05/201802/11/2020

AfriForum het in April 2018 Laerskool Kenmare in Roodepoort as deel van die burgerregte-organisasie se teenboelieveldtog besoek. Dié teenboelieveldtog dien as bewusmaking van afknouery in skole en sluit inligtingsessies met leerders, onderwysers en ouers in.

“Dit is vir AfriForum belangrik om saam met leerders, onderwysers en ouers te werk om ’n verskil te maak en afknouery in skole hok te slaan. Elke leerder wat die teenboeliepraatjie bywoon, word toegerus met die kennis om as leier in situasies op te tree waar afknouery plaasvind,” sê Leandie Bräsler, AfriForum se koördineerder vir leierskapsontwikkeling.

AfriForum het tydens Laerskool Kenmare se teenboelieweek in samewerking met Manie Botha van die HeyLei-program praatjies vir onderwysers aangebied. Leerders kon aktief deelneem deur belangrike waardes uit te beeld: Hulle kon tydens die teenboelieweek groen dra teen jaloesie, geel vir leef-en-laat-leef, rooi vir liefde en medemenslikheid, wit vir vrede en om vloekery teen te staan, en blou teen fisieke afknouery.

“Laerskool Kenmare is ’n waardegedrewe skool. Ons sewe waardes help kinders om slim besluite te neem gedurende pouses, in die klas en oral waar hulle met mense te doen kry. Ons leef met respek, dissipline en eerlikheid; ons skep hoop, gee om vir ander, leef gesond en tree lojaal op,” verduidelik Wouter Immelman, hoof van Laerskool Kenmare.
“Ek glo dit is uiters noodsaaklik om deur middel van opleiding, rigtinggewing en ondersteuning in jongmense te belê. Sodoende help ons nie net met die opheffing van vandag se leiers nie, maar ook dié van môre. Dit bly ’n voorreg om saam met ouers, onderwysers en die gemeenskap hande te vat om afknouery in skole hok te slaan,” sê Manie Botha van HeyLei.

Stuur ’n e-pos na boelie@afriforum.co.za indien jou kind se skool by hierdie veldtog en leierskapsontwikkelingsprogram betrokke wil raak.