Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum se teenboelieveldtogspan en Matteus besoek skole in Oudtshoorn met #DieValFilm

Die burgerregteorganisasie AfriForum se teenboelieveldtogspan het op 22, 23 en 24 Februarie elf skole in Oudtshoorn besoek. Dié veldtog dien as bewusmaking van afknouery in skole en sluit inligtingsessies met leerders in. Van die skole wat besoek is, is De Villiers Primêr, Sacred Heart Primêr, Colridge Primêr, Bergsig Primêr, Aurial College, Langenhoven Gimnasium, Saturnus Primêr, Van Reede Laerskool, Hoërskool Oudtshoorn, Bridgton Sekondêr en Môrester Sekondêr.

Laerskole het die praatjie saam met ons gelukbringer, Matteus geniet terwyl die hoërskoolleerders na #DieValFilm gekyk het. Twee praatjies is vir die ouers in die gemeenskap aangebied rakende die gevare van kuberafknouery.

“Dit is vir AfriForum belangrik om saam met leerders, onderwysers en ouers te werk om ’n verskil te maak en afknouery in skole hok te slaan. Veilige skole sorg ook vir ’n veilige gemeenskap, nie net vir nou nie, maar ook vir die toekoms. Elke leerder wat die teenboeliepraatjie bywoon, word met die nodige kennis en vaardighede toegerus om as ’n leier in situasies op te tree waar afknouery plaasvind – om boeliebestand te wees. Leerders word ook geleer hoe om tussen afknouery en konflik te onderskei,” sê Leandie Bräsler, AfriForum se bestuurder vir jeugleierskap.

“Ons glo dat daar oor boeliegedrag in ons skole gepraat moet word en dat dié gesprekke uiters belangrik is. Dit vestig goeie waardes onder ons leerders. Skole weerspieël wat in gemeenskappe gebeur en dat daar baie blootstelling aan geweld en negatiewe konflikhantering is. As ons leerders kan leer hoe om verskille en konflik konstruktief te hanteer maak ons hulle gereed om as volwassenes daarop voort te bou en om sodoende ’n gemeenskap wat respek en liefde vir mekaar betoon te help vestig,” sê Wilma Espach, maatskaplike werker van die Wes-Kaapse Onderwysdepartement (WKOD).

“#DieValFilm skep bewusmaking oor boeliegedrag en selfdood en bemagtig leerders met die nodige kennis vir wanneer afknouery plaasvind. Hierdie film fokus veral ook op kuberafknouery, juis omdat dit deesdae ’n groot probleem onder tieners is,” voeg Bräsler by.

#DieValFilm kan gratis op AfriForumTV by www.afriforumtv.co.za gestroom word. Die toepassing kan ook op Google Play Store, of van die App Store afgelaai word. Vir meer inligting oor die film, besoek gerus www.dievalfilm.co.za.

Vir meer inligting oor AfriForum se teenboelieveldtog besoek gerus www.teenboelie.co.za.