Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Buurtwag Mediaverklarings | Mediaverklarings

AFRIFORUM SE NOORDSTREEK-BUURTWAGTE VERHOOG SIGBAARHEID

DeurAfriForum 26/01/202102/09/2021

Die AfriForum-buurtwagte in die noordstreek het die afgelope drie maande sigbaarheid in die drie provinsies in samewerking met verskeie veiligheidsinstansies verhoog as deel van die burgerregteorganisasie se nasionale sigbaarheidsprojek.

Nagenoeg 2 280 AfriForum-buurtwaglede en 1 204 ander veiligheidsrolspelers het tydens hierdie tydperk aan die verskeie sigbaarheidsprojekte deelgeneem.

Dit volg nadat AfriForum op 1 November 2020 ’n nasionale projek van stapel gestuur het om polisiëringsigbaarheid oor die feesseisoen te verhoog. Hierdie sigbaarheidsprojek het tot 15 Januarie 2021 voortgeduur.

Volgens Bronwen Pretorius, provinsiale veiligheidskoördineerder vir Mpumalanga, is dit ’n riem onder die hart om te sien dat AfriForum-buurtwagte altyd daar is om hul gemeenskappe te beveilig, ’n veiliger omgewing te skep, en goeie samewerking met die SAPD en ander veiligheidsinstansies handhaaf.

“AfriForum ondersteun enige buurtwag wat op ’n georganiseerde wyse wil funksioneer. Georganiseerde buurtwagte dra by tot proaktiewe optrede en dit lei tot ’n veiliger gemeenskap,” sê Llewellynn Hemmens, AfriForum se provinsiale veiligheidskoördineerder vir Gauteng.

“Terwyl misdaad gewoonlik oor Desember-vakansies toeneem, het die AfriForum-buurtwagte dit op hul skouers geneem om hul sigbaarheid en paraatheid te verhoog. Misdadigers verlaat ’n georganiseerde gemeenskap,” sê Andries Opperman, AfriForum se provinsiale veiligheidskoördineerder vir Limpopo.

Om betrokke te raak by AfriForum se buurtwagte in Gauteng, Mpumalanga en Limpopo, laai die Telegram-toep af en soek na @AfriForumBuurtBot (https://t.me/AfriForumBuurtBot).