AfriForum se Moot-takke skenk skolehulppakkette aan skole
AfriForum se Moot-, Oos-Moot- en Wes-Moot-tak het sewe skolehulppakkette aan skole in die area versprei as deel van die #AfriForumStaanSaam vir Skole-projek wat in samewerking met AfriForum Jeug van stapel gestuur is. Die skolehulppakkette bevat COVID-19-inligtingstukke, patrone vir gesigmaskers, klaskamerplakkate, elektroniese termometers, handreiniger en handreinigerstaanders.
Die pakkette is aan die volgende skole geskenk: Hoërskool Wonderboom, Laerskool Pierneef, Laerskool Mayville, Laerskool Wonderboom-Suid, Laerskool Tuine, Hoërskool Tuine en Gereformeerde Gekombineerde Skool Dirk Postma.
“Dit is ’n voorreg om skole in hierdie tyd by te staan en om seker te maak dat hulle voorbereid is om die 2020 akademiese jaar voort te sit. Skole het nie vir hierdie ekstra uitgawes begroot nie en daarom is dit vir AfriForum belangrik om skole by te staan,” sê Gerhard Hildebrandt, voorsitter van AfriForum se Moot-tak.
“AfriForum het baie versoeke van skole ontvang omdat hulle onvoldoende hulp van die Departement van Onderwys ontvang het. Daarom het AfriForum se Moot-takke aan die skoleprojek deelgeneem om sodoende te verseker dat leerders veilig terug kan keer skool toe,” sê Sampie Steinberg, AfriForum se distrikskoördineerder vir Groter Pretoria.
“Al die skole is baie dankbaar vir die steun wat hulle ontvang het en dit is ’n riem onder die hart om te sien hoe almal saamspan om die beste van die situasie te maak,” sê Steinberg verder.
AfriForum het reeds meer as 40 000 bottels handreiniger, 8 000 plakkate en 200 termometers aan skole landwyd versprei.
AfriForum se Groter Pretoria-takke wil graag nóg skole ondersteun in die uitdagende tye wat voorlê om te verseker dat hulle op ’n veilige wyse funksioneer. Die takke moedig gemeenskappe daarom aan om by die inisiatief betrokke raak: SMS jou naam na 45341 (R1) en word deel van die oplossing.
