Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum se Hessekwa-strukture neem aan nasionale versetpatrollie deel

Deur 10/06/202002/11/2020

AfriForum se Hessekwa-strukture, wat die Riversdal-buurtwag en die Albertinia-plaaswag insluit, het op 6 Junie 2020 aan AfriForum se nasionale versetpatrollie deelgeneem. Dié versetpatrollie vorm deel van die amptelike aktivering van AfriForum se buurt- en plaaswagte wat hul bedrywighede weer tydens vlak 3 van die inperking mag hervat.

Altesaam 45 AfriForum-lede het aan die patrollie deelgeneem en het 1 799 km in 27 voertuie afgelê. Al die deelnemers het streng voldoen aan die vereiste regulasies en binne die raamwerk van die wet opgetree.

Vlak 3-regulasies bepaal dat enigiemand hul huis mag verlaat om ’n spesifieke diens te lewer, behalwe aktiwiteite wat pertinent uitgesluit is soos uiteengesit in tabel 2 van dié regulasies. Dié patrollie het daartoe gelei dat lt.genl. Fannie Masemola, Adjunkkommissaris van Polisiëring, AfriForum se interpretasie van die regulasies kon insien en hy ’n skrywe hieroor aan alle provinsiale en eenheidskommissarisse gestuur het.

Die burgerregteorganisasie was, nadat vlak 3-regulasies in werking getree het, van mening dat dié regulasies nie die bedrywighede van buurt-, hoewe- en plaaswagte uitsluit nie. AfriForum was so oortuig dat dié interpretasie korrek is, dat hulle onderneem het om enige buurt-, hoewe- en plaaswag met regshulp by te staan indien een van dié wagte se lede in hegtenis geneem word bloot omdat die lede hul onderskeie gemeenskappe beveilig.

“Die versetpatrollie was ’n groot sukses danksy goeie samewerking tussen al die betrokke persone en dit is lekker om weer terug op die pad te wees om ons gemeenskappe te beveilig,” sê Johan Crous, veiligheidsvoorsitter van AfriForum se Hessekwa-tak.

“Die veiligheidstrukture in die Hessekwa-streek was baie opgewonde om weer te begin patrolleer om sodoende weer ’n aktiewe rol te speel in misdaadvoorkoming,” sê Arno Greyling, AfriForum se distrikskoördineerder vir die Suid-Kaap.

Raak vandag nog by een van AfriForum se veiligheidstrukture betrokke: SMS “Veilig” na 45353 (R1).