AfriForum se Groter Pretoria-takke ontvang handreiniger en gesigmaskers
AfriForum se Groter Pretoria-takke het op 17 en 20 April 2020 handreiniger en gesigmaskers ontvang om hulle en die gemeenskap teen die opdoen van COVID-19 te help beskerm. Ses-en-sestig 5 liter-bottels handreiniger en 660 gesigmaskers is aan verskeie takke afgelewer om te versprei in gebiede waar daar nood is.
Dít volg nadat die burgerregteorganisasie die afgelope weke ’n nasionale projek van stapel gestuur het waartydens 15 000 bottels handreiniger aan verskeie polisiestasies, nooddienste en ouetehuise geskenk is. AfriForum het op 15 April 2020 ’n verdere 4 000 bottels handreiniger en 3 200 gesigmaskers na sy 53 takke in die noordstreek versprei om gemeenskappe te ondersteun.
Handreiniger en gesigmaskers is reeds aan die volgende instansies uitgedeel:
- Ons Herberg-ouetehuis
- Brinant Sekuriteit
- Moot-ouetehuis
- Vista-kliniek
- Wondervilla-ouetehuis
- Danville-aftreeoord
- Danville-woonstelle
- Silwerkroon-aftreeoord, Silverton
“AfriForum se Groter Pretoria-takke bied deurlopend bystand aan hul gemeenskappe om te verseker dat hulle die nodige hulp ontvang om die verspreiding van COVID-19 te help voorkom,” sê Sampie Steinberg, AfriForum se distrikskoördineerder vir Groter Pretoria.
AfriForum doen ’n beroep op gemeenskappe om die organisasie se Facebook-blad gereeld te besoek om die nuutste inligting oor die staat van inperking en COVID-19 te kry.
Raak vandag nog by jou naaste AfriForum tak betrokke en wees deel van die verskil: SMS jou naam na 45341 (R1).
