Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum se buurtwagte in die Groter Pretoria-gebied neem deel aan nasionale massapatrollie

DeurAfriForum 23/09/202002/11/2020

AfriForum se buurtwagte in die Groter Pretoria-gebied het op 18 September deelgeneem aan dié burgerregteorganisasie se nasionale massapatrollie. Die patrollie het in samewerking met verskeie sekuriteitsmaatskappye en gemeenskapslede plaasgevind, wat gehelp het om sigbaarheid in die area te verhoog.

Altesaam 349 voertuie, 496 gemeenskapslede en 259 AfriForum-buurtwaglede het aan die patrollie deelgeneem. Die lede het gedurende die massapatrollie 10 145 km in die verskillende gebiede afgelê en het met agt insidente bystand gebied. Alle deelnemers het streng voldoen aan al die vereiste regulasies en binne die raamwerk van die toepaslike wetgewing opgetree.

“Dit is vir AfriForum uiters belangrik om voort te kan gaan met sigbaarheidspatrollies ten einde die veiligheid van ons gemeenskappe te verseker,” sê Sampie Steinberg, AfriForum se distrikskoördineerder vir die Groter Pretoria-Noord-area.

Jp Nel, AfriForum se distrikskoördineerder vir die Groter Pretoria-Suid-area, sê goeie samewerking tussen verskillende strukture is uiters belangrik tydens hierdie onsekere tye, om misdaad hok te slaan.

“Suksesse soos hierdie word gedryf deur samewerking en doeltreffende kommunikasie tussen die gemeenskap en privaat sekuriteit. Die buurtwagte stel ’n goeie voorbeeld van die sukses wat bereik kan word as die gemeenskap saamstaan en proaktief optree.”

“AfriForum doen ’n beroep op gemeenskappe om betrokke te raak en self hul veiligheid te prioritiseer. Raak by enige veiligheidsinstelling in jou omgewing betrokke of sluit vandag nog by AfriForum aan en word deel van die oplossing,” sluit Steinberg af.

Raak vandag aktief by AfriForum se buurtwagte betrokke: SMS jou naam na 45341 (R1) en maak op dié manier ’n positiewe bydrae.