Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum: Privaatsektor-stelsels sal kan help met munisipale invorderings en doeltreffendheid

AfriForum het hom vandag weereens uitgespreek oor munisipaliteite se onvermoë om hulself behoorlik te bestuur en meen dat die tyd lankal ryp is vir die privaatsektor om hul stelsels en prosesse aan munisipaliteite beskikbaar te stel om verdere agteruitgang te verhoed. Dít volg ná besprekings vandeesweek tydens die sitting van die parlementêre portefeuljekomitee oor water en sanitasie, waar skokkende syfers van munisipaliteite se verbruikerskuld en die miljarde rande wat nodig is om watersuiweringswerke op te gradeer aan die lig gekom het.

Tydens hierdie sitting het dr. Sean Phillips, direkteur-generaal van Water en Sanitasie, gesê dat munisipaliteite landwyd R100 miljard gaan moet opdok om opgraderings aan watersuiweringswerke aan te bring – miljarde waaroor munisipaliteite nie beskik nie.

Velenkosini Hlabisa, minister van Samewerkende Regering en Tradisionele Sake, het ook hierdie week bekendgemaak dat staatsdepartemente se munisipale skuld landwyd R21 miljard beloop. Hy meen dat munisipaliteite 10% van hierdie invorderings aan instandhouding- en herstelwerk moet spandeer . Volgens AfriForum is dit ’n tree in die regte rigting mits munisipaliteite vertrou kon word om hul finansies behoorlik te bestuur.

Volgens Marais de Vaal, AfriForum se raadgewer vir Omgewingsake, is munisipaliteite bloot nie in staat om hulself uit hul huidige krisis te bestuur nie. “Munisipaliteite is veronderstel om self hulle finansies te bestuur, maar jarelange korrupsie en wanbesteding het daartoe gelei dat munisipaliteite nie meer in staat is om hul eie finansies te bestuur nie. Burgerlike organisasies en die privaatsektor moet ’n oorsigrol te speel om te verseker dat fondse nie wanbestee word nie en om munisipale prosesse meer doeltreffend te maak.”

De Vaal meen dat die fondse vir opgraderings-, instandhouding- en herstelwerk nie direk aan munisipaliteite toevertrou moet word nie aangesien die risiko te groot is dat hierdie fondse in munisipale amptenare se sakke sal verdwyn. “Dit is ook ongelukkig so dat munisipaliteite nie eens die regte stelsels in plek het om uitstaande skuld in te vorder nie, terwyl toelaes aan munisipaliteite toegeken en dan wanbestee word.”

“Die nuutste inligting oor die Rooiwal-afvalwatersuiweringsaanleg, waarvan die herstel en opgradering nou na verwagting byna dubbel soveel gaan kos as wat aanvanklik daarvoor begroot is, is die gevolg van wanpraktyke, korrupsie en vertragings. Dit bevestig AfriForum se standpunt opnuut: die privaatsektor se stelsels moet van die begin af implementeer word om doeltreffendheid te verseker.”