AfriForum moedig die polisiekommissaris aan om op misdaad te fokus, nie op politiek nie.
Die burgerregteorganisasie AfriForum het die nuutaangestelde nasionale kommissaris van die Suid-Afrikaanse Polisiediens (SAPD), generaal Fannie Masemola, versoek om homself nie soos baie van sy voorgangers in die politiek vas te loop nie, maar om op misdaadbekamping te fokus. Die tydige aanstelling van die nuwe nasionale kommissaris, ná die onlangse beëindiging van generaal Sitole se kontrak, het die behoefte aan ’n waarnemende kommissaris uitgeskakel en sal hopelik lei tot die stabiliteit, modernisering en hernuwing van die vertroue wat die SAPD so broodnodig het. Aangesien Masemola reeds sedert 2016 deel van die SAPD se senior nasionale leierskap is, behoort Masemola ’n duidelike prentjie te hê van die dringendste kwessies binne die diens.
AfriForum neem ook kennis van die president se uitsprake oor ’n meer inklusiewe benadering tot polisiëring en die behoefte om hande te vat met verskillende sektore van die samelewing. AfriForum benadruk in daardie opsig die organisasie se bereidwilligheid om saam met die SAPD te werk om ’n veiliger Suid-Afrika te skep. Dit geld vir die AfriForum-buurtwagte se voortgesette samewerking met plaaslike polisiebeamptes op grondvlak om misdaad te bekamp, sowel as pogings om nasionale polisiestrategieë te verbeter. Dit kan die skepping van spesifieke teenstrategieë vir spesifieke misdade soos plaasaanvalle en -moorde en die implementering daarvan op nasionale vlak insluit.
“’n Mens kan dalk vra hoekom Masemola nie die nodige leierskap kon verskaf om die SAPD-skip om te draai in sy vorige, reeds senior rolle nie. Ons hoop nietemin dat sy aanstelling nie sal lei tot ’n voortsetting van wat ons die afgelope paar jaar in die SAPD gesien het nie. As Masemola sy kennis en ervaring gebruik om op langtermyn verbeterings eerder as bloot korttermyn bewegings te fokus, sal hy dalk die SAPD suksesvol in die toekoms in kan lei,” sê Guido Urlings, bestuurder van ondersteuningsdienste vir AfriForum se gemeenskapsveiligheidsafdeling.
In dié verband het AfriForum kennis geneem van kommer oor die nuwe nasionale kommissaris se ouderdom en die moontlikheid dat hy binne die volgende paar jaar met pensioen gaan. “Dit sal die beleidstabiliteit wat die SAPD so broodnodig het ernstig in gevaar stel en ons hoop dus van harte dat dit tydens die besluitnemingsproses oorweeg is,” sê Jacques Broodryk, veldtogbestuurder by AfriForum.
“Ons wens die nuwe kommissaris geluk met sy aanstelling, en ons sien uit na konstruktiewe interaksies met hom oor die SAPD se belangrike rol binne Suid-Afrikaanse gemeenskappe. Ons hoop dat hy die president se opmerkings ter harte sal neem en die SAPD se verhoudings met ander rolspelers, soos AfriForum-buurtwagte sal verbeter, en sodoende gemeenskappe se vertroue herbou,” sluit Broodryk af.
