AfriForum maak stem dik teen Bela-wetsontwerp by openbare verhoor in Upington
Verteenwoordigers van die burgerregteorganisasie AfriForum het vandag, die openbare verhoor in Upington bygewoon oor die Wysigingswetsontwerp op Basiese Onderwyswette (beter bekend as die BELA-wet). Werner Strauss, AfriForum se distrikskoördineerder vir die Noord-Kaap, het AfriForum by dié verhoor verteenwoordig deur ’n voorlegging te lewer waarin beklemtoon is dat die ANC se poging om meer mag oor skole in die land te bekom, vernietigend vir gehalte onderrig oor die algemeen en Afrikaanse onderwys in die besonder sal wees. AfriForum het ook ’n memorandum aan die parlementêre portefeuljekomitee oor basiese onderwys oorhandig.
AfriForum het benadruk dat die voorstelle in die wetsontwerp dat die provinsiale onderwyshoofde voortaan die finale sê oor onder meer die toelatings- en taalbeleid van skole moet hê, die mees aanvegbare aspek daarvan is. Dít kom neer op onaanvaarbare toenemende magsentralisasie in die hande van die staat.
Tans geld die bepalings van die Skolewet wat ’n positiewe samewerkingsmodel tussen die staat en skoolgemeenskappe, soos verteenwoordig deur beheerliggame van skole, behels. AfriForum se standpunt is dat beheerliggame as demokraties verkose verteenwoordigers van ouers, leerders en plaaslike skoolgemeenskappe, die beste in staat is om die behoeftes van hul skole te bepaal en die mees gepaste insette kan gee om te verseker dat kinders toegang tot uitnemende onderwys in ’n vormende opvoedkundige en kulturele omgewing kan geniet. Kwessies soos die taalbeleid en toelatingsvereistes moet die behoeftes van die gemeenskap dien, nie ’n sentrale regeringsverteenwoordiger wat dikwels onbeskaamd ’n politieke agenda dryf nie.
“AfriForum is verder ook bekommerd oor gedeeltes van die wetsontwerp wat bots met die Grondwet, bestaande wetgewing en uitsprake van die Konstitusionele Hof. As dit in die huidige formaat aanvaar word, sal litigasie beslis daarteen volg, wat net meer van belastingbetalers se swaarverdiende geld sal mors,” sê Alana Bailey, AfriForum se hoof van Kultuursake.
AfriForum is geheel en al teen die aanvaarding van die wysigingswetsontwerp gekant.
