Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum-brandspan help brande in Hartbeespoort blus

Die AfriForum-brandspan in Hartbeespoort het in Julie gehelp om ’n aantal brande in die omgewing te blus. Die brande het op verskillende plekke ontstaan.

’n Brand het op 27 Julie omstreeks 19:15 in die gebou by die Paoli-hondepark uitgebreek. Die AfriForum-brandspan het met drie waterkarre en ses brandbestryders by die toneel opgedaag waar die Hartbeespoort-brandweer reeds besig was om die vuur in bedwang te bring. Die gebou het ongelukkig heeltemal afgebrand.

Op 19 Julie is ’n veldbrand omstreeks 18:30 in Meerhof gerapporteer. Die brandspan het die brand spoedig met twee brandkarre onder beheer gekry. Kort daarna is ’n brand op Melodi-kleinhoewes aangemeld waar ’n houthuis in gevaar was. Dieselfde span het die brand in bedwang gebring voordat dit die houthuis kon bereik. Een hektaar veld is egter afgebrand. Op 11 Julie omstreeks 18:30 het nog ’n brand in Meerhof ontstaan – dié keer tussen huise. Die AfriForum-span is ontbied om te help voorkom dat die brand versprei.

’n Groot veldbrand het op 15 Julie in die vleiland tussen Ifafi en Melodi uitgebreek waar eiendomme, insluitend twee grasdakhuise, in gevaar was. AfriForum se brandspan kon daarin slaag om die huise met een waterkar te beskerm, maar sowat 15 hektaar veld het afgebrand.

AfriForum se Hartbeespoort-brandspan is op 7 Julie omstreeks 21:00 na ’n brand op Zilkaatsnek ontbied. Drie waterkarre en bykans die hele brandspan was op die toneel en het gehelp om ongeveer drie hektaar se veld wat afgebrand het, te blus.

“Dit is van uiterste belang om te help om brande te blus om ons gemeenskappe en eiendom te beskerm. Elke brand wat ons onder beheer bring, voorkom potensiële verlies van lewens en grootskaalse skade,” sê Dennis Webster, voorsitter van AfriForum se Hartbeespoort-tak.

“Ek wil graag al die lede bedank wat gehelp het om die brande te blus. Julle toewyding en harde werk is ’n bewys van die krag van ons gemeenskap. Saam is ons sterker en ek is trots op die samewerking en moed wat hulle getoon het,” sê Armand Viljoen, AfriForum se distrikskoördineerder vir Marico.

AfriForum bedank die Hartbeespoort-brandweer vir hul vinnige optrede op 27 Julie en moedig die gemeenskap aan om betrokke te raak by AfriForum se brandbestrydingsinisiatiewe.

Om hierdie inisiatief te ondersteun, kontak Webster by 082 435 5636.