Tzaneen-tak snel brandweer te hulp tydens verwoestende brande in Magoebaskloof
Die onlangse brande in Magoebaskloof het honderde hektaar plantasies en plase verwoes, maar te midde van dié verwoesting skyn daar ’n baken van hoop in die vorm van AfriForum se Tzaneen-tak en die inwoners wat hierdie tak ondersteun. Die tak het op 12 Julie, terwyl sy buurtwag self ingespring het en die brande help bedwing het, broodnodige skenkings saam met die gemeenskap aan die plaaslike brandweer gemaak. Die tak het onder meer 21 koeldranke, 21 energiestafies en twee bokse elektrolietmengsels aan die brandbestryders geskenk. Hulle is boonop ook met noodhulp produkte toegerus soos gaas, verbande en salf vir brandwonde.
“Hierdie skenkings spreek nie net die onmiddellike behoeftes aan van diegene wat die brande help bestry het nie, maar dien ook as ’n kragtige voorbeeld van AfriForum se onwrikbare toewyding aan die gemeenskap,” sê Hendrik Kotze, AfriForum se provinsiale koördineerder van Limpopo.
Benewens hierdie skenkings het AfriForum se Tzaneen-buurtwag self gehelp om die brande te blus. Hulle het drie dae lank onverpoosd saam met plaaslike brandbestryders gewerk om die brand te bedwing. Die brande het vroeër vandeesmaand in die Magoebaskloof-omgewing ontstaan en vinnig weens sterk winde versprei.
“Die betekenis van die Tzaneen-tak se bydrae strek verder as die materiële ondersteuning wat verskaf is. Dit vergestalt ’n gees van samewerking wat gekweek word wanneer ’n gemeenskaplike doelwit bereik moet word. In tye van krisis is hierdie vertonings van eenheid van kardinale belang om veerkragtigheid te bevorder en hoop by ’n gemeenskap in te boesem,” sê Shaun Potgieter, AfriForum se Tzaneen-buurtwagleier.
Kotze sê die betrokkenheid van AfriForum se Tzaneen-tak is ’n bewys van die krag van gemeenskapsgedrewe inisiatiewe. “Deur aktief betrokke te raak by brandbestrydingspogings en daarna materiële bystand te verleen aan diegene wat geraak is, het die tak ’n prysenswaardige voorbeeld gestel vir ander om na te volg. Hul optrede beklemtoon die invloedryke rol wat plaaslike organisasies in krisistye kan speel.”
Besoek www.wordlid.co.za of kontak Stephan Honiball, voorsitter van die Tzaneen-tak, by 082 771 0777 om aktief by die burgerregteorganisasie betrokke te raak.
