Brits-tak verfraai Laerskool Olienpark-skoolgronde met nuwe bome
Die AfriForum-tak in Brits het op 22 September agt bome by die Laerskool Olienpark geplant ter bewusmaking van Boomplantmaand. Elke graad, asook die onderwysers, het die geleentheid gehad om ’n boom te plant. Daar is vier olienhoutbome, twee vaderlandswilgerbome en twee wildepruimbome aangeplant.
Dit is om verskeie redes belangrik om bome te plant. Bome speel ’n belangrike rol in die verbetering van lugkwaliteit, terwyl dit ook die algemene gesondheid van mense verbeter. Bome kan ook ’n fisiese skuiling teen ekstreme weersomstandighede bied en bome se wortels help om gronderosie te voorkom. En net soos hierdie projek by die Laerskool Olienpark, kan boomplantaktiwiteite gemeenskappe saambring en mense aanmoedig om saam te werk aan ’n gemeenskaplike doel.
“Boomplantdag is belangrik omdat dit bewustheid skep oor die kritieke rol wat bome in die ekosisteem speel deur suurstof te produseer, koolstofdioksied te absorbeer en biodiversiteit te ondersteun. Dit bied ook ’n geleentheid vir gemeenskappe om saam te kom en ’n positiewe impak op die omgewing te maak deur bome te plant, wat ’n langtermyn-erfenis van skoonheid en hulpbronbeskerming skep,” sê Stephan Roos, voorsitter van AfriForum se Brits-tak.
“’n Unieke feit oor die Olea Africana, wat algemeen bekend staan as die African olive of olienhoutboom in Suid-Afrika, is dat dit een van die oudste en mees gehalte boomspesies in die wêreld is. Van hierdie bome is duisende jare oud en word beskou as ’n lewende bewys van die geskiedenis en die veranderende omgewing van hul areas. Die vrugte van die olienhoutboom is eetbaar en het ’n hoë voedingswaarde. In sommige dele van Suid-Afrika word hierdie vrugte gebruik om olie te produseer, wat ’n belangrike voedselbron kan wees. Die boom is dus ’n waardevolle bron vir voedselsekuriteit,” sê Natasha Fourie, wat verantwoordelik is vir die bemarking en ledewerwing van die Brits-tak.
Skakel vir Roos by 073 188 3223 om by die Brits-tak aan te sluit. Dié tak moedig die gemeenskap aan om vandag nog betrokke te raak en deel van die oplossing te word.
