AFRIFORUM #VEGENBOU MET ’N LIED IN DIE HART IN 2021
Deur Alet Rademeyer
In 2021 gaan AfriForum sy Veg-En-Bou-plan aansienlik verskerp om ’n vry, veilige en voorspoedige toekoms vir Afrikaners aan die suidpunt van Afrika te verseker.
Verlede jaar was ’n onstuimige jaar, maar AfriForum kon steeds daarin slaag om te groei. AfriForum het daarin geslaag om sy posisie as leidende rolspeler in die stryd vir Afrikaners en minderhede se vryhede te versterk, sê Ernst Roets, hoof van Beleid en Aksie by AfriForum.
Roets sê in die lig van versnelde staatsverval moet die Veg-En-Bou-strategie verskerp word.
“In dié jaar sal die burgerregte-organisasie vir geregtigheid teen agteruitgang veg, terwyl daar ook op voetsoolvlak alternatiewe werklikhede geskep word wat dit vir ons gemeenskappe moontlik maak om met ’n groeiende mate van selfstandigheid en selfbestuur na ons eie belange om te sien.”
Meer inligting sal binnekort oor AfriForum se Veg-En-Bou-plan vir 2021 bekendgemaak word.
Die plan maak reeds baie gemeenskappe opgewonde en het MD Greyling, sanger en omroeper by Pretoria FM, geïnspireer om ’n Veg-En-Bou-lied vir AfriForum te skryf. Dit word vanoggend amptelik vrygestel en kan geluister word by https://www.youtube.com/watch?v=CCfif0rHLwA&feature=youtu.be
Volgens Greyling het die idee vir die lied ontstaan oor die kontraste wat hy tans in die land beleef. “Aan die een kant beleef ek swaarkry, moedeloosheid, geweld, plaasmoorde, korrupsie, werkloosheid en nog baie ander dinge wat my daagliks omkrap. Aan die ander kant sien ek organisasies soos AfriForum en individue wat hoop het. Mense wat glo dat daar ’n beter toekoms is en dat daardie toekoms in ons eie hande lê.”
Greyling sê die lirieke kom diep uit sy hart. “Gedagtes rondom Veg-En-Bou maal al lank deur my kop. Om in die jaar 2020/21 vir Jan van Riebeeck te wil blameer vir alles wat verkeerd is, is totaal absurd. Ek verwys spottenderwys daarna in die lied.
“Ek glo ons moet eerlik oor dinge praat sonder om skuldig te voel oor wie en wat ons is. Ek is trots op my kultuur en herkoms en leef dit ten volle uit.
“Ek hoop dat die lied mense sal inspireer om weer trots te wees en in te spring en te werk en om ’n voorbeeld vir ander te wees.”
Die lirieke van die Veg-En-Bou-lied
Staan weer op
Staan weer op in wat jy glo en wie jy is met krag van Bo
Wees net jy
Wees die man vir jou gesin die pa of ma wat hul verdien
Doen die beste wat jy kan al is dit min al wil jy val
Sê jou sê
Praat oor als wat jou nog pla want hoeveel kan ons nog verdra
Doen jou deel
Doen net dit waarin jy glo net wat jy voel jou hart verloor
Vir ons kinders en ons land en die belofte anderkant
Jy kan breek ons sal bou
Jy kan vat ons sal hou
Jy kan brand net wat jy wil, ons kies werk ons kies verskil
Jy kan skree ons sal leer
Jy kan buig dan sê ons nee
As ek buig, buig ek voor Hom want Hy is groot ek staan verstom
Ek sal my laaste asem hier in terug ploeg want ek weet nou waar ek vandaan kom
En ek sal dit – ek sal dit nie verloor
Jy sal nie vat waarin ek glo
Sê vir Jan
Sê vir Jan hy kan ontspan want als is werklik nie sy skuld
Hou aan glo, hou aan glo ons was al hier en ons het sterker uitgekom
Ons sal weer jy kan probeer sal aanhou veg en bou en leer.
