Limpopo se vullisterreine in haglike toestand
AfriForum het vanjaar 135 vullisterreine landwyd geoudit as deel van die organisasie se nasionale projek om die gehalte van vullisterreine in Suid-Afrika te meet.
Slegs een van die nege vullisterreine wat in Limpopo geoudit is, het aan nasionale standaarde voldoen. Kragtens toepaslike wetgewing en regulasies, waaronder die Wet op Nasionale Omgewingsbestuur: Vullis 59 van 2008, moet ’n vullisterrein aan bepaalde vereistes voldoen.
Só vergelyk die vullisterreine in Limpopo :
| Naam van tak/vullisterrein | Munisipaliteit/ verantwoordelike instelling | Lisensienommer | Nakomingstelling (%) | ||||||
| Limpopo | 2015 | 2016 | 2017 | 2018 | 2019 | 2020 | |||
| Ellisras | Lephalale PM | – | – | – | 58 | 32 | 16 | 22 | |
| Groblersdal | Elias Motsoaledi PM | 12/4//10-B/10M2 | 20 | 72 | 90 | 92 | 98 | – | |
| Hoedspruit | Maruleng PM | – | – | – | 18 | 18 | 20 | – | |
| Marble Hall | Ephraim Mogale PM | 16/2/7/B300/D58/ZI/P261 | 72 | 88 | 84 | 84 | 84 | 78 | |
| Naboomspruit | Mookgophong PM | 16/2/7/A600/D7/Z2/P399 | 28 | 36 | 19 | 32 | 34 | 30 | |
| Naboomspruit
(Western Breeze-oorlaaistasie) |
Mookgophong PM | – | – | – | – | 20 | 20 | – | |
| Naboomspruit
(Die Oog-oorlaaistasie) |
Mookgophong PM | – | – | – | – | 32 | – | – | |
| Nylstroom | Modimolle PM | 16/2/7/A600/D2/Z1/P380 | 48 | 16 | – | 12 | 0 | 4 | |
| Phalaborwa | Ba-Phalaborwa PM | 16/2/7/B700/016/21/P276 | 84 | 80 | 32 | 64 | 36 | 54 | |
| Leeupoort | Thabazimbi PM | 16/2/7/A240/D21/21/P354 | 52 | – | – | 2 | 4 | Toe | |
| Louis Trichardt | Makhado PM | 12/9/11/L413/5 | – | 32 | 70 | 80 | 84 | Toe | |
| Rooiberg | Thabazimbi PM | – | – | – | – | – | – | 0 | |
| Thabazimbi | Thabazimbi PM | – | – | – | – | – | – | 0 | |
| Tzaneen | Greater Tzaneen PM | 16/2/7/B800/D2/Z23/1/P501 | – | 100 | 100 | 100 | 100 | 98 | |
| Warmbad | Bela-Bela PM | B33/2/123/3 | – | 56 | 40 | 37 | 40 | 38 | |
Die oudit bestaan uit ’n lys van 33 vrae wat die minimum vereistes vir vullisterreine in Suid-Afrika meet en sluit faktore soos toegangsbeheer, brande, mediese afval, omheining, rehabilitasie en dies meer in. ’n Vullisterrein moet minstens 80% behaal om aan wetgewing te voldoen.
Volgens Magdel Strauss, AfriForum se distrikskoördineerder vir Limpopo, is die meeste vullisterreine in Limpopo in ’n haglike toestand. ”Dit kan hoofsaaklik toegeskryf word aan munisipaliteite wat nie die terreine en die toerusting herstel en instandhou nie.”
Strauss sê voorts die algemeenste probleme wat AfriForum tydens die oudit ondervind het, is die afwesigheid van afvalbestuurslisensies en die algehele wanbestuur van die terreine. “Die meeste terreine beskik ook nie oor die nodige personeel of voldoende toegangsbeheer nie.”
AfriForum-takke sal ook druk op owerhede in hul gebiede plaas om afvalmoniteringskomitees te stig om die afvalbestuursproses te verbeter. Dié komitees sal bestaan uit munisipaliteite en belanghebbende partye wat vullisbestuur in die betrokke dorp wil verbeter. AfriForum gaan ook ná afloop van die projek ’n vergadering met Barbara Creecy, Minister van Omgewingsake, belê om terreine te identifiseer sodat dit herstel en weer op peil gebring kan word.
Die ouditverslag sal ook aan die Groen Skerpioene oorhandig word vir verdere ondersoek en optrede teen munisipaliteite wat nie aan die vereistes voldoen nie. AfriForum sal die proses deurlopend moniteer om te verseker dat die vullisterreine se standaard genoegsaam verbeter.
- Lees die volledige verslag hier.
