Noordwes se vullisterreine in haglike toestand
AfriForum het vanjaar 135 vullisterreine landwyd geoudit as deel van die organisasie se nasionale projek om die gehalte van vullisterreine in Suid-Afrika te meet.
Slegs 2 van die 21 vullisterreine wat in Noordwes geoudit is, het aan nasionale standaarde voldoen. Kragtens toepaslike wetgewing en regulasies, waaronder die Wet op Nasionale Omgewingsbestuur: Vullis (Wet no. 59 van 2008), moet ’n vullisterrein aan bepaalde vereistes voldoen.
Só vergelyk die vullisterreine in Noordwes:
| Naam van tak/vullisterrein | Munisipaliteit/ verantwoordelike instelling | Lisensienommer | Nakomingstelling (%) | ||||||
| Noordwes: | 2015 | 2016 | 2017 | 2018 | 2019 | 2020 | |||
| Bloemhof | Lekwa-Teemane PM | NWP/WM/DR4/2011/11 | 16 | 20 | 2 | 10 | 6 | 44 | |
| Christiana | Lekwa-Teemane PM | NWP/WM/DR4/2011/09 | 36 | 4 | 12 | 4 | 18 | ||
| Coligny | Ditsobotla PM | – | 12 | 8 | 0 | 0 | 0 | 0 | |
| Delareyville | Tswaing PM | B33/2/330/44/P219 | 8 | 8 | 9 | 2 | 10 | 28 | |
| Brits (Hartebeesfontein) | Madibeng PM | B33/2/0121/41/P81 | – | 84 | – | – | – | 26 | |
| Klerksdorp | City of Matlosana PM | 16/2/7/C241/D4Z2/P514 | 64 | – | 45 | 18 | 10 | 36 | |
| Koster | Kgetlengrivier PM | – | – | – | – | – | 4 | 2 | |
| Lichtenburg | Ditsobotla PM | B33/2/330/3/P58 | – | 8 | – | – | 16 | 2 | |
| Mooinooi | Sebanye-Stilwater (Interwaste) | 16/2/7/A210/C29/Z1/P379 | – | – | – | – | 94 | 94 | |
| Zeerust | Ramotshere Moiloa PM | – | – | – | – | – | 4 | 16 | |
| Ottosdal | Tswaing PM | NWP/WM/NM4/2012/11 | – | 40 | 29 | 2 | – | – | |
| Potchefstroom | Tlokwe PM | 16/2/7/C231/D13/Z1/P | – | 100 | 90 | 94 | 64 | 16 | |
| Potchefstroom-oorlaaistasie | Tlokwe PM | – | – | – | – | 89 | – | – | |
| Wolmaransstad | Maquassi Hills PM | B33/2/330/19/P166 | – | – | – | – | 34 | 8 | |
| Rustenburg (Waterval) | Rustenburg PM | D09202-01 | – | – | 37 | 88 | 62 | 94 | |
| Sannieshof | Tswaing PM | NWP/WM/NM4/2012/09 | – | 12 | 2 | 2 | 2 | 34 | |
| Schweizer-Reneke | Mamusa PM | 16/2/7/C301/D2/23/P421 | – | 64 | 17 | – | 8 | 22 | |
| Stella | Naledi PM | NWP/WM/DR1/2013/16 | 12 | 16 | 4 | 2 | – | – | |
| Swartruggens | Kgetlengrivier PM | – | – | – | 0 | 0 | – | 0 | |
| Ventersdorp | JB Marks PM | – | – | — | 3 | – | 0 | ||
| Vryburg | Naledi PM | NWP/WM/DR1/2009/01 | 92 | 96 | 50 | 52 | 32 | 28 | |
Die oudit bestaan uit ’n lys van 33 vrae wat die minimum vereistes vir vullisterreine in Suid-Afrika meet en sluit faktore soos toegangsbeheer, brande, mediese afval, omheining, rehabilitasie en dies meer in. ’n Vullisterrein moet minstens 80% behaal om aan wetgewing te voldoen.
Volgens Petrus Coetzee, AfriForum se distrikskoördineerder vir Marico, is die meeste vullisterreine in Noordwes in ’n haglike toestand. “Die meeste vullisterreine is in ’n slegte toestand en dit kan hoofsaaklik toegeskryf word aan die munisipaliteite se versuim om die infrastruktuur en toerusting van die vullisterreine te herstel en te onderhou.
Coetzee sê voorts die algemeenste probleme wat AfriForum tydens die oudit ondervind het, is onder meer die afwesigheid van afvalbestuurslisensies en die algehele wanbestuur van die terreine. “Die meeste van die terreine het ook nie die nodige personeel om dit te bestuur nie en daar is feitlik geen toegangsbeheer nie. Die gebrek aan toegangsbeheer lei verder daartoe dat mense op die terreine woon.”
AfriForum-takke sal druk op owerhede in hul gebiede plaas om afvalmoniteringskomitees te stig om die afvalbestuursproses te verbeter. Dié komitees sal bestaan uit munisipaliteite en belanghebbende partye wat vullisbestuur in die betrokke dorp wil verbeter. AfriForum gaan ook ná afloop van die projek ’n vergadering met Barbara Creecy, Minister van Omgewingsake, belê om terreine te identifiseer sodat dit herstel en weer op ’n aanvaarbare standaard gebring kan word.
Die ouditverslag sal ook aan die Groen Skerpioene oorhandig word vir verdere ondersoek en optrede teen munisipaliteite wat nie aan die vereistes voldoen nie. AfriForum sal die proses deurlopend moniteer om te verseker dat die vullisterreine se standaard genoegsaam verbeter.
- Lees die volledige verslag hier.
