Boomplantmaand: AfriForum dra by tot ’n groener toekoms
Die AfriForum-tak in Oudtshoorn het op 28 September 2019 witstinkhout- en witkareebome in die Luscombe-parkie, Rademeyer- en Oosthuizenstraat geplant, asook in die buurdorp De Rust as deel van dié burgerregteorganisasie se jaarlikse boomplantmaandprojek.
Volgens Arno Greyling, AfriForum se distrikskoördineerder vir die Suid-Kaap, beoog die organisasie om vanjaar landwyd meer as 3 000 bome te plant.
“Deur inheemse bome te plant bewaar ons nie net ons omgewing en maak dit ’n mooier plek om in te bly nie, maar ons wys ook dat ons hoop vir die toekoms het. Bome is veel meer as bloot ’n belangrike deel van die ekostelsel of ’n noodsaaklike natuurlike hulpbron – bome is simbolies van lewe,” sê Greyling.
AfriForum fokus jaarliks op sowel ’n boomspesie wat algemeen voorkom as ’n skaars boomspesie. Die algemene boom vir 2019 is die maroela (Sclerocarya birrea), terwyl die skaars boom die appelblaar (Philenoptera violacea) is. AfriForum moedig egter sy lede aan om inheemse bome te plant wat in hul omgewings aard.
“Boomplantmaand bied die perfekte geleentheid om ’n blywende verskil in ons gemeenskappe te maak. Bome het egter deurlopende sorg nodig om tot voordeel van almal te floreer en die AfriForum-tak in Oudtshoorn onderneem om hierdie sorg te verskaf. Daarom het die tak ook onderneem om die bome in Parkweg te versorg. Walletjies om die bome is herstel en die bome sal ook gereeld natgelei word. Bome is simbolies daarvan dat ons hier is om te bly en hoop vir die toekoms het,” meen Johan Conradie, voorsitter van AfriForum se Oudtshoorn-tak.
Die tak moedig die gemeenskap aan om by die projek betrokke te raak en deel te word van ’n groener toekoms. Sluit by AfriForum aan: SMS jou naam na 45350 (R1).
