Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Artikels | Forum Nuus

AfriForum besoek Knysna ’n jaar na verwoestende brande

Deurafriforum 07/06/201802/11/2020

Vandag ’n jaar gelede is die lyke van Tony Johnston, sy vrou Madré en hul seuntjie Michael buite hul huis in die Elandskraal-omgewing in Knysna gevind.

Die gesin is deur rook oorval toe die verwoestende Knysna-brande op 7 Junie, op klein Michael se derde verjaarsdag, hul lewens geëis het. Madré was ook agt maande swanger met die egpaar se tweede kind.

Sowat 10 000 inwoners van Knysna en ander woongebiede is dakloos gelaat en drie ander lewens is ook geëis. 12 000 hektaar plantasies is ook weens dié vernietigende brande beskadig.

Die totale skade word in randwaarde op R5 miljard bereken.

AfriForum het destyds dadelik ingespring en in samewerking met Solidariteit Helpende Hand hul noodfonds uitgebrei en bystand aan slagoffers in brandgeteisterde gebiede gelewer deur verskeie benodigdhede aan te koop en te skenk.

’n Omvattende verslag en dokumentêr oor die brande, Knysna uit die As, is ook bekendgestel om slagoffers se verhale te deel.

AfriForum Trauma, ’n eenheid van dié burgerregtewaghond wat op trauma-ontlonting, -berading en –ondersteuning fokus, het ook berading aan slagoffers van die brande gebied. Nantes Kelder, voorheen hoof van AfriForum Trauma, het gesê die eenheid het ook ŉ opvolgbesoek met slagoffers gehad. Dit was positief om te sien hoe sekere mense die trauma wat hulle ervaar het op ŉ positiewe manier aangepak en verwerk het.

Sedert September verlede jaar het die burgerregte-organisasie ook verskeie skenkings aan die Gaan Groen Knysna-projek gemaak, wat ten doel het om ‘n volhoubare oplossing na die brande te bied. Plaaslike takke in die Kaap het ook self inheemse bome, waaronder die Cape Ash, Waterbessie en die Outeniqua-geelhout, in die Pledge Natuurreservaat geplant.

Reint Dykema, kennisbestuurder by AfriForum, besoek Knysna vandeesweek en sal ’n video vervaardig oor die gebeure ’n jaar later. Dit sal Maandag op Forum Nuus beskikbaar wees.